Հեղինակությունների մասին մեր պատկերացումները ստեղծում են ժամանակն ու հասարակարգերը: Հեղինակություններին ստեղծում են, հետո սկսում են նրանց դեմ պայքարել: Ովքե՞ր են անցյալի ու մեր ժամանակի հեղինակությունները: Արվեստը չի վախենում մատնացույց անել, երբեմն էլ ծաղրի ենթարկել «օրվա հերոսներին», նրանք կարող են լինել հենց իրենք` արվեստագետները:
Գրիգոր Խաչատրյանի արվեստում տեսանելի են անցյալի ու ներկայի «պաշտելի անհատները»: ԱպրելաԿերպի հերթական հաղորդումը բացահայտում է, թե ինչպես են հեղինակությունները ձևավորվում առօրյայում` դառնալով արվեստի ու գրականության հետաքրքրության նյութ, թեմա: Գրիգոր Խաչատրյանի արվեստանոցում Նազելի Օհանյանը զրուցում է արվեստի քննադատ Նազարեթ Կարոյանի և արձակագիր Երվանդ Վարդանյանի հետ:
