Մենք ամեն ինչ անում ենք, որպեսզի մեր երեխաներն ունենան հագուստ, լավ սնուննդ, ապրեն տաք բնակարանում և այլն, բայց, ցավոք, մենք շատ քիչ ենք լսում մեր երեխաներին: Մենք շատ քիչ ենք հաշվի առնում նրանց կարծիքը, ինչը մեծ բացթողում է, որովհետև երեխաների ամենակարևոր իրավունքը ձայնի, կարծիք հայտնելու իրավունքն է:
Շատ երեխաներ այսօր զրկված են ընտանիքում ապրելու հնարավորությունից, քանի որ ընտանիքները (սոցիալական ծանր պայմանների պատճառով) պարզապես նրանց հանձնել են մանկատուն, որովհետ չեն կարողանում հոգալ երեխաների մինիմալ պահանջները, բայց նրանցից չեն հրաժարվել: Ստացվում է, որ այս երեխաները չեն կարող նոր ընտանիքներ ունենալ, չեն կարող այլ ընտանիք գնալ, որովհետև փաստացի ունեն ծնողներ: Այսինքն` երեխաները զրկվում են, թե սեփական ընտանիքում ապրելու, թե նոր ընտանիք ունենալու հնարավորություններից:
