Գերմանացի գրող Թոմաս Մաննը նշում էր, որ գերմանացու մասին խոսելիս կարևոր է խոսել երաժշտության մասին, քանի որ երաժշտությունը մի կողմից՝ ճշգրիտ ու ֆորմալ, իսկ մյուս կողմից՝ հուզական և իռացիոնալ է։ Գերմանական մշակույթում մեծ դեր է խաղում ռեֆորմացիան, որը կապված է Մարտին Լյութերի անվան հետ։
«Ազգ» հասկացության ի հայտ գալը Ֆրանսիական հեղափոխության արդյունք է, երբ քաղաքացիները սկսեցին վերհանել իրենց ազատության իրավունքի հարցը։ Ըստ Մաննի, «ազգ» և «ազատություն» հասկացությունները երբեք փոխկապակցված չեն եղել գերմանական մշակույթում, քանի որ գերմանացիները ունեն եզրույթի ընկալման ժողովրդական, հակաեվրոպական մոտեցում։
