Այն սուբյեկտները, որոնք դեռևս պետություն չեն, այլ գտնվում են պետականաշինության, այսինքն պետության նոր կայացման փուլում, չեն կարող կաշկանդված լինել տարածքային ամբողջականությունը հարգելու պարտականությամբ: Այս նույն տրամաբանությունն օգտագործում է Միջազգային իրավունքի դատարանը հենց Կոսովոյի անկախության հռչակագրի մասին խոսելիս՝ նշելով, որ Կոսովոյի անկախության հռչակագիրը պարզապես չի կարող խախտել տարածքային ամբողջականության սկզբունքը այն պարզ պատճառով, որ Կոսովոն դեռևս հանդիսանում է պետականաշինության, պետության նոր կայացման փուլում գտնվող սուբյեկտ, այլ ոչ թե իսկ պետություն: Ի՞նչ է սա նշանակում: Տեսականորեն սա նշանակում է, որ իր ինքնորոշման համար պայքարող սուբյեկտները ֆիզիկապես չեն կարող խախտել տարածքային ամբողջականության սկզբունքը՝ գտնվելով բոլորովին այլ կարգավորման հարթակում…