Առօրյայում մենք կամ ընդհանրապես չենք բախվում հասարակագիտական հետազոտություններին, կամ էլ բախվում ենք դրանց շատ պրակտիկ, մեթոդական մասին։ Մինչև հետազոտությունը սկսելը այն պետք է ծրագրել, քանի որ մեթոդից երբեք չեն սկսում։ Հետազոտությունը պետք է սկզբից դիզայն արվի։ Հետազոտության դիզայնների տեսակներն են՝ էքսպերիմենտալ, լոնգիտյուդային, խաչաձև, դեպքի ուսումնասիրություն։ Հետազոտությունները պետք է դիզայն արվեն, և հետազոտության մեթոդները, որոնց բախվում ենք առօրյայում պետք է ունենան տեսամեթոդաբանական հիմքեր։
Էքսպերիմենտալ դիզայնը ենթադրում է իրականության մեջ որոշակի միջամտություն անել և դիտարկել, թե ինչ է տեղի ունենում։ Լոնգիտյուդային դիզայնով հետազոտությունը ենթադրում է համեմատություն անել ժամանակի մեջ և դիտարկել, թե ինչպես է երևույթը փոփոխվում կամ զարգանում։ Դեպքերի ուսումնասիրությունը նշանակում է հետազոտական սուբյեկտի ուսումնասիրություն, իսկ խաչաձևի դեպքում համեմատություն է կատարվում տարբեր խմբերի միջև։
